Әһл Бејт – АБНА – хәбәр аҝентлијинә верилән хәбәрә әсасән, һаким Елдар Микајыловун сәдрлији илә кечирилән просесдә прокурор иттиһам актыны елан едиб. Иттиһама ҝөрә, тәгсирләндирилән шәхсләр - Франса вә Австрија вәтәндашлары Рамзан Тершијев, Сухраб Мержујев, Хасан Халдыхаројев, Түркијә вәтәндашы Илһан Ташбеј вә Азәрбајҹан вәтәндашы Рамиз Мирзәјев 2009-ҹу ил ијулун 16-да Азәрбајҹан Дөвләт Сәрһәд Хидмәтинин Загатала Сәрһәд Дәстәсинин хидмәти әразисиндә Азәрбајҹан дөвләт сәрһәдини ганунсуз позмаг ҹәһд едибләр. Сәрһәд нарјады онларын ҹәһдинин гаршыны алмаг истәјәркән мүтәшәккил силаһлы дәстәнин үзвләри сәрһәдчиләрә гаршы одлу силаһ тәтбиг едиб. Нәтиҹәдә сәрһәд нарјадынын үзвү, әсҝәр Исајев Бәһруз Әсҝәр оғлу јараланыб. Ҹаваб атәши илә дәстә үзвләриндән бири өлдүрүлүб, диҝәри исә јараланыб. Силаһлы дәстәнин үзвләри һаванын гаранлыг, әразинин дағлыг вә мешәлик олмасындан истифадә едәрәк һадисә јериндән гачыблар. Өлдүрүлән силаһлынын үзәриндән Австрија дөвләтинин вәтәндашына мәхсус шәхсијјәти тәсдиг едән сәнәд тапылыб. Һәмин сәнәддә онун ады Салман Умдајев кими гејд едилиб.

Һадисәдән бир нечә ҝүн сонра исә ганунсуз силаһлы груплашманын үзвләри һәбс едилиб.

Мүтәшәккил дәстәнин мәгсәди Панкиси дәрәсинә ҝетмәк олуб.

Тәгсирләндирилән шәхсләр Азәрбајҹан Республикасы Ҹинајәт Мәҹәлләсинин 29, 120.2.1-ҹи (. бир груп шәхс, габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (тәшкилат) тәрәфиндән адам өлдүрмәјә ҹәһд), 29.120.2.3-ҹү (зәрәрчәкмиш шәхсин хидмәти вәзифәсини вә ја иҹтимаи борҹуну јеринә јетирмәси илә әлагәдар онун өзүнү вә ја јахын гоһумларыны өлдүрмәјә ҹәһд), 120.2.4-ҹү (хүсуси амансызлыгла вә ја үмүми тәһлүкәли үсулла адам өлдүрмәјә ҹәһд), 214-ҹү (террорчулуг), 228-ҹи (ганунсуз олараг одлу силаһ ҝәздирмә) вә 318-ҹи (дөвләт сәрһәдини ганунсуз кечмә) маддәләри илә иттиһам олунурлар.

Тәгсирләндирилән шәхсләр елан олунмуш иттиһам үзрә өзләрини гисмән тәгсирли билибләр. Онлар өзләрини 228-ҹи (ганунсуз олараг одлу силаһ ҝәздирмә) вә 318-ҹи (дөвләт сәрһәдини ганунсуз кечмә) маддәләри илә тәгсирли билибләр.

Даһа сонра тәгсирләндирилән Рамзан Тершијев ифадә вериб. О, 2009-ҹу ил мајын 2-дә Истанбулдан Бакыја ҝәлдијини билдириб: “Бизим мәгсәдимиз Чеченистана ҝетмәк олуб. Мән Чеченистанда ахтарышдајам. Она ҝөрә, ҝизли јолла ора ҝетмәк истәјирдим”.

Просес диҝәр тәгсирләндириләнләрин ифадәләри илә давам етдирилир.

Гејд едәк ки, Рамзан Тершијев, Сухраб Мержујев вә Хасан Халдыхаројев мүхтәлиф вахтларда ајры-ајры чечен дәстәләринин тәркибиндә Русија Федерал гүввәләринә гаршы вурушублар.