Ujerumani ni nchi yenye wasiwasi mkubwa zaidi na matokeo haya ya uchaguzi wa
rais nchini Ufaransa. Kwani katika kipindi cha zaidi ya miaka miwili iliyopita
toka msukosuko wa madeni uzikumbe Nchi za Ulaya, Ujerumani ilikuwa
ikishirikiana na Ufaransa katika kutekeleza sera za kubana matumizi katika nchi
za wanachama wa Umoja wa Ulaya. Ujerumani ina wasiwasi kwamba, kushindwa kupata
awamu nyingine ya urais kwa Nicolas Sarkozy kutasababisha kuvunjika kwa
ushirikiano huo kati ya Ufaransa na Ujerumani, na Nchi zengine za wanachama wa
Umoja wa Ulaya zinaweza kupunguza nguvu ya kutekeleza sera za kubana matumizi
na kuleta  mageuzi ya kiuchumi, na hata kuziweka kando.
Tumeshuhudia kuwa toka mwanzoni mwa mwaka huu, Umoja wa Ulaya ulianza
kurekebisha sera zake za kiuchumi, yaani kutoa kipaumbele kwa lengo la kuhimiza
ongezeko la uchumi. Tangu msukosuko wa madeni utokee barani Ulaya, wanasiasa wa
Umoja wa Ulaya walikuwa wanatatizwa na kuweka uwiano kati ya kubana matumizi na
kuhimiza ongezeko la uchumi. Kutoka na matatizo ya madeni, nchi za Ulaya
zililazimika kuchukua hatua za kubana matumizi, lakini pia zina wasiwasi kwamba
hatua hizo zinaweza kukwamisha ongezeko la uchumi. Hivi sasa inaonekana
wasiwasi huo umebadilika kuwa hali halisi. Kubana matumizi kupita kiasi
kumefanya uchumi barani Ulaya urudi katika hali ya kudidimia na idadi ya watu
wasio na ajira kuendelea kuongezeka. Umoja wa Ulaya unatunga mkakati wa
kuchochea ongezeko la uchumi ambao unatarajiwa kupitishwa kwenye mkutano wa
wakuu utakaofanyika mwezi Juni. Hata hivyo Ujerumani haifurahii maoni hayo na
haipendi sera za sasa za kubana matumizi ziachwe.